Востэм (Конкурсное задание: Скромный)

Улӥз-вылӥз король. Огшоры сыӵе король.
Нош со тодэ вал, со – огшоры öвöл. Солэн туж потэ вал, мукетъёсыз но мед тодозы шуыса.
Мед сётысалзы солы кыӵе ке но паймымон ним.
Нош кунмуртъёс асьсэ пöлын огшоры гинэ нимало вал сое Асьмелэн.
- Адӟиды-а Асьмелэсьсэ? Лемлет бантикъёс вож штаниос вылын? Али озьы нулдо на, шат?
Король туж сюлмаське вал озьы вераськемзы сярысь:
- Кулэез вал соослы со бантикъёс!
- Асьмелэн нош мар дауртэм, кылӥды ни-а? Заседание шорын интыысьтыз султэм, пукон вылэ тубем но кылбуръёс лыдӟыны кутскем. Пуштросэз но, рифмаез но öвöл! Валантэм кылбуръёс…
- Маиз уг кельшы кылбуръёсын? – вожез потэ корольлэн.
- Маиз ке но уг тырмы Асьмелэнэзлэн…
- Акыльтӥды ни тӥ ваньды мыным! – черектӥз король, кырмиз песятаезлэсь, король Георглэсь, бюстсэ но вань кужмыныз сэрпалтӥз выж вылэ. Бюст выжез ик пасьяз.
- Тодӥськоды-а, собере, кызьы Асьмелэн Карл шоры ( корольлэн бускелез, кудӥз улэ со улын) бюстэз сэрпалтӥз, Карл моганы ик кутскиз.
Татын король öз ни чида, но малпаз адямиос азе уз пота ини шуыса.
- Милям монархмы вал кадь, - сюлмаськыны кутскизы кунмуртъёс, арня ортчыса.
- Тодӥськоды на-а, со кылбуръёсты яратэ вал но сыӵе азьло ик вераны луонтэм адями вал.
- Кытын со али?
- Озьы ке но, маиз ке но солэн вал.
Король öз чида ни но потӥз.
- Ӟечкыласьком королез! – кеськизы ваньзы.
Нош король шуиз:
- Тани мон сылӥсько тӥ азьын. Мынам кык королевской киы, кык королевской пыды но бадӟым королевской лулы.
Татысен ваньзы бöрдыны дась вал ини. Соин ик нимазы сое Востэм.
- Коть тазьы ке но, - йырыныз шонтӥз Асьмелэн Востэммы.